El ciernu. Información d'Asturies y curiosidaes

Fonte: Aruelu.com

Art Zoller WAGNER ye un americanu que s’alcuentra de vacaciones estos díes per Asturies. Ye’l diseñador y creador del foru asturianUS.us y una persona mui vinculada cola tradición asturiana. Ensin más, estos díes ta aprovechando les vacaciones pa deprender a tocar la gaita na Escuela d’Asturianía d’Uviéu. Aruelu.com fizo-y esta entrevista pa los nuesos llectores

Art Zoller Wagner, ñaz en Baltimore, Maryland, anque recorrióse medio mundiu enantes viviendo n’Iowa, Madrid, Washington DC ente otros llugares. Artista, llicenciáu n’artes plástiques, dende 1999 dedícase al desenrrollu de páxines web y la publicidá n’internet.

¿Cómo se creó la idea d’un foru que comunicara a los Estaos Xuníos d’America (EXA) con Asturies?

Too emprimó con un grupu d’amigos, una collacia mía y otru amigu diéronme la idea d’un llugar onde mos comunicáramos ente los asturianos emigrados nos EXA y les sos families. Ún de los mios collacios escribió un entamu pa un llibru sobre una familia asturiana, nun remembro esautamente de qué llugar yera, qu’emigraba a los EXA na gueta d’una vida meyor y cuntó con una perbona aceutación. Los emigraos asturianos entamaren a interesase pola so identidá, inundando a la mio amiga y entrungando sobre les hestories de les sos families, cómo buscar les families n’Asturies, y la cultura asturiana. Asina ñació’l foru como una ferramienta pa comunicanos.

La idea cimera d’www.AsturianUS.us, yera un foru ente americanos, pero un mes más tarde los llectores dieren la vuelta a la idea, faciendo d’esti foru una ferramienta dixital de comunicación ente asturianos, astur-americanos, y lleendes urbanes. Ye una adautación mui feliz.

La emigración d’asturianos a los EXA, ¿cuálos foron los oríxenes?

Pue dicise que los asturianos cuntan ente los primeros emigrantes europeos a lo qu’agora se llama los Estaos Xuníos. Pedro Menéndez fundó la primer ciudá en Norte América Saint Augustine en Florida. Los primeros emigrantes asturianos daten del sieglu XVI-XVII, siendo’l Sureste, anteriormente Méxicu, pero anguaño pertenez a los EXA’l llugar qu’escoyeren. Dellos yeren families xudíes, pero d’orixe asturianu. La mayor afluyencia d’emigrantes foi a primeros del sieglu pasáu (años 1910-20). N’Asturies hebío fame y numberosos conflictos llaborales, especialmente na Real Compañía Asturiana de Zinc d’Arnao que fai posible que se baxaren los sueldos y medraren les hores de trabayu, amás tamién nes mines de carbón pero en menor midia.

Dende los EXA lleguen empresarios que sabedores de les habilidaes de los obreros asturianos de zinc y de los problemes económicos y llaborales esistentes n’Asturies, ufierten trabayu a los asturianos en nueves fábriques de zinc nos EXA, trabayos iguales con distintes empreses y pequeñes meyores condiciones llaborales y económiques. Esto fai que munchos trabayadores y les sos families decidan emigrar a los EXA, especialmente de la zona de Castrillón y comarca d’Avilés y en menor midida de la Cuenca’l Caudal. Munchos asturianos van a trabayar a les fábriques americanes, en Virxinia Occidental, u al menos había 3 o 4 fábriques de Zinc, pa depués trabayar n’aceríes, siempres na industria pesao, Kansas, Pensylvania, Ohio,... munchos d’estos llugares mui alloñaos ente sigo.

Virxinia Occidental yera un estáu principalmente rural y por ello conservador. Los asturianos nel entamu vivíen en “ghetos” como los italianos o los polacos. Anque col pasu del tiempu éstos foren integrándose na sociedá americana, lo que nun ye’l casu de los italianos quien, por exemplu, inda güei mantienen munchu más de la so cultura, tal vez por ser munchu más numberosos.

Ún de los temes más trataos nel foru, son custiones sobre la cultura y tradición asturiana, ¿los raigaños tán presentes ente los emigrantes asturianos?

Los miembros d’asturianUS.us s’interesen por saber de les nueses costumes, pero namái ente los astur-americanos queda la gastronomía y un pocu ente los más mayores un pocu de llingua asturiana. En cuantes la gastronomía queden coses como la empanada de bonitu, ye tradición facer chorizu, un gustu pa sopes y estofaos (paecíos a llenteyes y fabada), coses que nun se pierden col tiempu. Ye interesante que los asturianos mayores que falan n’asturianu piensen que falan castellán.

Pue dicise qu’haza los años 30-50 quedaba “fino” ser americanu, yeran los tiempos del KKK y dicir que yeras asturianu taba mal mirao, como pertenecer a otra triba de cultures estremaes y de distinta relixón. En cambiu, agora nos EXA’l tratu es diferente, incluso investígase, cuasi privilexáu (ríse).

¿Cómo se ve dende los EXA a Asturies?

Hai un desconocimientu xeneralizáu, anque se pue dicir qu’hai un ciertu interés por conocela. Ún de los obstáculos ye’l problema col idioma. A partir de les terceres xeneraciones d’emigrantes l’idioma emplegáu nel vínculu familiar ye l’americanu, el castellán sábese por estudialu na escuela, amás que’l castellán fálase mui mal nel ambitu familiar con rasgos de la llingua asturiana.

Esisti una obra teatral, pémeque ye inglesa, de George Bernard Shaw, titulada Pygmalian y una adautación de cine My Fair Lady perconocíes nos EXA que traten d’un home d’alta clas interesáu nuna chica de la clas baxa y nuna de les canciones de la pelicula, l’home tenta adeprender a falar a la chica utilizando la rima “The rain in Spain falls mainly on the plain”, que vien a dicir que la lluvia n’España cai na meseta, lo cual quier dicir el pocu conocimientu qu’esisti de la zona norte nos EXA. El conocimientu d’España ye escasu, puesto que piensen pola canción que llueve abondo na meseta castellana.

¿Esisti un texíu asociativu asturianu nos EXA?

Esisten dellos Centros Asturianos en Nueva York, Tampa, Miami,... quiciabes dalgún más. En Nueva York hai persones pero nun tien dengún edificiu p’asociase, en cambeu en Tampa esisti un gran edificiu, con un gran teatru incluso llego a tener un hospital, pero agora nun esisten munches persones, pero nos años 50-80, yeren enforma bayuroses les persones que movíen el movimientu asociativu, agora vense obligaos a arrendar parte l’edificiu a otros coleutivos porque nun puen mantenelu. Tamién esisti ASUSA, formada por nuevos xóvenes emigraos a los EXA.

Ente los proyeutos ta la idea de crear una banda de gaites, pero las distancies ente nós son descomanaos y esto torga cualquier tipu de propuesta.

¿Qué pues dicimos de la política asturiana?

Echo en falta un partíu políticu n’Asturies que tire pola economía y la cultura y identidá asturiana. Paez que se ta desaniciando la identidá hestórica asturiana. Col pasu del tiempu Asturies nun se va estremar munchu de lo que ye España, o tal vez cola globalización, d’una cultura "avanzada" y mundial. Qué murnio sedría, ¿non?

Ye murnio, dos partíos tienen tol poder ensin una visión fundamental que pue faer dalgo pal futuru cultural y económico d’Asturies. Intuyo per parte del PP un pocu d’interés haza la llingua asturiana, polo menos nun seutor. Y prestaríame enforma’l sofitu del gobiernu pa la Escuela d’Asturianía. Nun son persones ñegatives; seguramente los más ye bona xente que tien bones intenciones. Pero paez que piensen na prósima eleición, a curtiu plazu, como en tolos llugares. Y esa falta de visión ta matando a Asturies.

Ye más. Tamién hai que dicir que los votantes de cualquier país reciben lo que piden (de verdá menos, pero nunca más). Si nun reclamamos un futuru más prósperu, nun aportará. Normalmente estos cambeos vienen de baxo, de la xente. ¿Ensin presión del pueblu, qué motivu tien un políticu pa facer dalgo pal bienestar xeneral? ¿Si pensamos solamente na subvención que recibe la familia, quién va a considerar el futuro de la “tierrina”?

Paez qu’Asturias se fexo a un sistema políticu de dos partíos. Los partíos menores yá nun cunten. Quiciás se mos presente una oportunidá. Nos EXA hai tantos "independientes" que camuden los votos d’un partíu a otro dependiendo de les aiciones de los partíos, que los partíos tienen qu’escuchar a los demandes del públicu más qu’equí n’Asturies. Al principiu, pensaba que los independientesy eran bobos o valetes, pero agora veo la verdá: ¡tienen munchu más poder que los militantes!

Si nun somos quien de votar a otros partíos cuando nun miren polo de nueso, nada va a camudar. A veces la llealtá ye mui gafa.

N’Asturies, PP y PSOE saquen un númberu de votos eleición tres eleición cuasi igual, lo qu’indica que los independientes son quien deben participar nel procesu, reclamando a los dos partíos, puen cambiar el votu nuna direición o notra. ¡Qué ocasión! Pero solamente si pensamos distinto. Güei participar nun partíu pequeñu nun ye más qu’un pasatiempu o caprichu. En cambiu, hai qu’entamar rellaciones colos dos partidos, y entóncenes votar pa que se muevan pa crear un meyor futuru p’Asturies. Nun va a ser una opción perfeuta, pero podemos crear una opción meyor de la que tenemos anguaño.

¿Qué ye lo que más te presta d’Asturies?

Los americanos y los asturianos somos daqué estremaos. Equí n’Asturies hai más vida social. ¿Cómo ye que teo tantos collacios n’EXA como n’Asturies, pero n’Asturies solo vivo un mes al añu? Lo que desplica esa gran diferencia, cuido, ye que nos EXA munchos viven en cases de planta baxa separtaes, namái conoces a los vecinos cuando tamos en coche. Solo se pue saludar cola mano. Asina nun se fain amigos. La vida social ye destremada. Y quedando los restos culturales de la "Prohibición" d’alcohol que teníemos nos EXA, tampoco ye tan común lo qu’esisti equí: que collacios alcuentren nun bar pa charrar, socializar. En cambiu, n’Asturies yes too más público, más social.

Préstame Asturies, pola forma de ser de los asturianos, xente más sano, la gastronomía, y la música por supuestu. Agora toi deprendiendo a tocar la gaita na Escuela d’Asturianía n’Uviéu.

Un saludu, compañeros.