Nun esisten criterios esautos que determinen la diferencia ente llingues y dialeutos, dalgunos de los criterios ainda resulten contradictorios. La diferencia esauta ye por tantu suxetiva. Depende de contestos socio-politicos nomar d’una mena u otra al sistema llingüisticu.

Dalgunos de los criterios polos cuales se nomen a dalgunes llingues, dialeutos parten de:

-Nun tener tradición escrita o lliteratura escrita reconocia

Fautores políticos, los falantes nun tiene un Estau o nación propios

El dialeutu s’utiliza intencionadamente pa nun reconocer derechos políticos.

 Falta de prestixu, pocu númberu de falantes. Nun pue dicise qu’esistan llinguas incorreutes, ya que toes son prauticamente identiques tantu en complexidá como en criterios llingüisticos.

 Pola falta d’autonomía respeutu a una llingua A o dominante.

Dialeutu na sociollingüistica, ye un términu ermu utilizau pa humildar munches vegaes a llingues minoritaries de muncha importancia cultural, como les llingues indixenas.L’idioma chinu tien dos dialeutos principales, el chino mandarin y el chinu cantones, ente ellos nun tan nidios, pero se les calificá como dialeutos de la mesma llingua. Nel casu contrariu tenemos al suecu, noruegu y el danés consideraos llingues y non dialeutos, pese a so semeyanza. Nel fondu d’esti contestu s’alcuentra la pertenencia a un pueblu o nación política. El dicionariu de la RAE nun pue ser más nidiu nesti aspeutu, calificando una llingua como un sistema de comunicación y espresión verbal propiu d’un pueblu o nación.

La consideración de dialeutu pal asturianu foi un de los primeros pilancos que llevó dende posiciones contraries a la defensa de la mesma propiciaes por factores políticos de calter centralista. Nueves entidaes sociollingüistiques na que rescampla l’Academia de la Llingua Asturiana (ALLA) demostraron a través d’estudios sociollinguisticos de la consideración del asturianu como llingua propia d’Asturies. Angüañu esi discutiniu ta zarrau dende ambetos académicos y políticos, cola aprebación de la Llei 1/1998, de 23 de marzu, d’usu y promoción del bable/asturiano onde nel so articulu 1 fala del bable/asturianu como llingua tradicional d’Asturies.

Los politicologos asturianos tan enfotaos en tratar a la llingua asturiana como un istrumentu p’alienar la nuesa identidá coleutiva, amenorgándola y apautando non incluyir na próxima reforma del Estatutu d’Autonomía asturianu, aprebau nel añu 1981, que t’acabantes d’aprebase la oficialidá de la mesma.El fechu d’afitar l’asturianu como llingua propia d’Asturies debió sentar sarpullíos na clase dirixente asturiano. Daquella la Llei d’usu y promoción foi aprevada pol PP (onde taba Serxu Marques, que llueu colo pa URAS y llueu pa casa) y pol PAS. 

La pena ye que n’Asturies, políticamente falando “tamos en pañales” no que respeuta a les vindicaciones nacionales, la sociedá asturiana camina y los partios nacionaliegos danse zapicaes. De xemes en cuandu llega la calma y ponense a camentar, esti ye un bon momentu p’entamar a trabayar en proyeutos políticos estables y de futuru.

En base a l’afirmación de que l’asturianu ye una llingua propia d’Asturies, amás de ser patrimoniu inmaterial (daquien tenia dubies al respeutu, ¿fai falta ponelu nun Estatutu?), ye tamién consecuente que la mesma esistencia d’una llingua lleva arreyau’l so propiu calter políticu, que ye la consideración d’Asturies como nación cultural y per ende política. Esta si que-yos manca a los poderes centralistes y equí ta’l resultau de lo que los Fernández, Sanchez, Lastra, Migoya, Areces y cia. tan alienando continuamente a travies de los sos mecanismos de poder (Alministración pública, medios de comunicación de prensa escrita, TPA, RTPA,..), por eso y quiciabes tamién poles perres ye polo que l’asturianu nun va llegar a ser oficial na viniente reforma del Estatutu d’autonomía.

Anque los estudios sociollinguisticos digan que más del 60% de los asturianos piden la oficialidá del asturianu, nel CAO esisten más de 200 organizaciones pro-llingua, se faigan les manifestaciones más numberoses dende l’ECOFIN  peles cais d’Uviéu o campañes de más de 6000 persones dando la cara pola oficialidá, nun va ser suficiente si nun hai un actor políticu asturianu qu’intervenga na vida política asturiana activamente en defensa de la mesma de clara vocación nacionalista (los amestos d’IU muerren nes sos contradicciones y nun cuayan).

Una definición de nación ye un conxuntu de persones d’un mesmu orixen etnicu que, xeneralmente, falen un mesmu idioma y tiene una tradición común. Ello ye un amestu de población, territorio, etnía o nación, llingua y Estau. Angüañu nel camentamientu politicu pue dicise qu’onde hai una llingua, hai una nación, como nos exemplos mentaos anteriormente de China y los países escandinavos.

Otru asuntu que trataremos otru día ye qu’una nación, lleva a un Estau. Un Estau ye una entidá política reconocia pola comunidá internacional. Alrodiu de los acontecimientos, si Kosovo ye un Estau reconociu parcialmente pola “comunidá internacional”, ¿nun lo ye tamién Osetia del Sur y Abjazia?

"Con España nun se pue negociar, sólo comunicarle'l día de la independencia" Joan Puig, ex-diputau d'ERC nel Congresu.

Más información n'ADN y nel so blogue.