El ciernu. Información d'Asturies y curiosidaes

Dende El Ciernu queremos cellebrar los 200 años de la Xunta Xeneral d'Asturies al declarase soberana'l 25 de Mayu de 1808, fechu hestoricu pala nuesa nación asturiana.  

..." Durante la revolución lliberal de mayu de 1808, que supunxo’l fin del Vieyu Réxime y l’entamu de la edá contemporania n’Asturies, la Xunta Xeneral d’Asturies declárase soberana’l 25 de mayu, reinterpretándose a ella mesma como asamblea llegal y representativa de los conceyos y estamentos asturianos, nun reconociendo otra autoridá superior a ella nin nengún gobiernu central en Madrid. El negase a reconocer el gobiernu central en Madrid foi una especie de golpe institucional revolucionariu y suversivu, una ruptura coles instituciones centrales representaes pola Audiencia y afitaes na representatividá lexítima del pueblu asturianu y de les tierres d’Asturies yá que según les tesis de los lliberales la soberanía reside nel pueblu y non nos monarques. El presidente de la Xunta Xeneral yéralo tamién de la Real Audiencia borbónica y tenía les atribuciones de gobernador d’Asturies. La Xunta Xeneral autoconvocábase a conceyu cada trés años na sala capitular de la catedral d’Uviéu ensin necesidá de permisu o preste real. La Xunta Xeneral yera una instución d’autogobiernu d’Asturies daquella integrada yá por lliberales o ilustraos como Flórez Estrada, elexíu yá Procurador Xeneral, Martinez Marina, Conde de Torenu, Marqués de Santa Cruz, Canga Argüelles o Queipo de Llano  que creíen na necesidá de reformes isntitucionales y dada esta lexitimidá xurídica van usala como argumentu pa declarar la soberanía del so gobiernu n’Asturies, firmando la paz con Inglaterra, incumpliendo les órdenes que veníen de les nueves autoridaes de Madrid y declarando la guerra a Francia y a la nueva dinastía napoleónica que se quería implantar na persona de Xosé I. Cuando la Xunta Xeneral Suprema d’Asturies entama la guerra, recluta un exércitu asturianu y tien por ello que diseñar una bandera p’Asturies, que sirviera tanto de símbolu institucional como d’insinia de guerra. La bandera nun podía ser otra que la figura de la Cruz de la Victoria sobre una tela azul, tal como dexaren afitao tanto Trelles Villademoros como Xovellanos sobre’l símbolu d’Asturies. A esta bandera amestóse-y un lema de guerra bordáu coles lletres ASTURIES NUNCA VENCIDA. La Xunta Suprema Xeneral sublevábase asina en nome d’Asturies, en nome de la soberanía del pueblu asturianu, según la teoría lliberal de la soberanía popular. La bandera asturiana de la Cruz de Pelayu tornaba otra vegada a ser símbolu d’otra entidá soberana, antaño reinu, agora principáu ensin príncipe." ... (sigui)

 Del articulu "Historia y signu de la bandera d'Asturies"

Autor: Xabiel Vilareyo y Villamil

Más información nel portal Asturies.com:

La llegada a Inglaterra de los comisionaos asturianos nel 1808: un documentu inéditu

Cola marcha de Covadonga Tomé al frente del cómite d'empresa del Hospital Grande Covián s'esplaya la llaceriosa situación na que se topa la redé de servicios sanitarios nel Oriente d'Asturies. Ya van más de 10 años dende que los trabayadores y usuarios del hospital pidin al Gobiernu asturianu que'l citau Hospital pase a la redé de centros de servicios sanitarios públicos d'Asturies. El Grande Covián ta xestionau por una Fundación privada.

 L'alministracion asturiana (PSOE) a lo más que llega ye a proponer una Fundación pública pal Hospital, fechu que nun aceuten les centrales sindicales que formen el cómite d'empresa.

Una proposición non de llei a favor de los trabayadores, una fuelga de 12 díes, una Plataforma ciudadan de sofitu y una manifestación de más de 3.000 persones poles caís de Les Arriondes, nun foron a algamar l'oxetivu de incluyir a estí centru mélicu de referencia del Oriente d'Asturies con una xestión dientru la sanidá pública.

Dolores Colunga, la nuea presidenta del cómite d'empresa siente nun poder cuntar con Covadonga Tomé nesta llucha, a piques de garrar cuatro meses d'escedencia pa colar del centru mélicu y d'Asturies con vistes a nun volver más pola precaria situación del Grande Covián.

Otru fracasu más del gobiernu socialista na so política d'apañar perres pal HUCA, un ñeru de gastos ensin fondu,de momentu va pa más de 45 millones d'euros de sobrecoste, pola falta de control de l'alministración pública nesti sen, y pol contrariu de caltener nuna precariedá insostenible'l mayor centru mélicu del oriente asturianu.

"La lógica del proceso de reformas estatutarias, afirmó, pretende garantizar «la viabilidad de los Estatutos y su articulación al proyecto común de España», pero sin impedir «que las peculiaridades de cada comunidad queden suficientemente reconocidas y preservadas»".Jose Luis Rodriguez Zapatero, güei en El comercio.

Según el caberu estudiu sociollingüisticu fecho n'Asturies, la mayor parte de la población ta a favor de la oficialidá de la llingua asturiana, pero los resultaos electorales nun faen más que desmentir esa tendencia, ya que les ociones polítiques que falen abiertamente o de xemes en cuandu d'oficializar la llingua son minoritaries.

Les manifestaciones feches poles asociaciones que puxen pola llingua son de les más numberoses (CAO, XDLLA), fainse milenta d'actos en favor de la mesma, toos desperdigaos pola xeografía asturiana, les sobenciones al usu de la mesma son tamién interesantes, sobremena palos grandes medios, otros pue dicise que viven d'ello, pero n'Asturies naide se mueve ensin que falen primeru los dirixentes de la FSA. Ye curiosu qu'angúañu son minoría nel Gobiernu asturianu y tovia tan na poltrona con vistes a tirar al menos otros tres años más.

Pero'l grupu o tribu más curiosu al mio paecer son le de los asturianofobos, ye una clas de persones que tando pola oficialidá (esto ye un decir), nun faen más que ser la mosca coyonera que siempre tien de tar sacando la tiesta o sacando la llingua a pacer (perdón pol blogue collaciu). Un exemplu tenemoslu nel casu de la tribu d'un blogue d'índole lliberalfacista qu'agora le da por implicar a un conociu sindicatu na defensa de la llingua asturiana dende va una riestra d'años col nacionalismu vascu, a la gueta de su "illegalización" (¿tan como teyes inverties estos asturianofobos?...). Esta tribu quier dexar ver nidiamente qu'enantes de la llingua hai munches otres coses (la COPE, los curas, la relixón,...) 

Nun ye la primer vegada que los asturianofobos se intentar facer notar con estos bilordios, el so llema ye "oficialidá si pero sin imposición" anque pue dicise que son de dereches, tiene un discursu asemeyau a la FSA, quiciabes pue inclinase un pocu más activu, en cuantes que formen la oposición política n'Asturies. Tamos d'alcuerdu nuna cosa OFICIALIDÁ, pero pa asoliviar al movimientu llingüisitcu asturianu y fraccionalu (esa ye la estratexia que más-yos presta a la FSA nos movimientos ecoloxistes, vecinales, lluches obreres, si nun pues con ellos, dividelos) nun aporten sinon que desgasten.

Angüañu ta debatiendose la reforma l'Estatutu, vamos ver si dan la cara pola nuesa llingua, ya qu'oficializarla ye un derechu nun ye una moneda de cambiu. La imposición se ta faciendo tolos dies na Alministración pública asturiana, nes escueles, na cai, nel centru de trabayu,... un pocu de discriminación positiva pa cola llingua nun taría de más nestí vieyu país.